Arnar Davíð Jónsson úr KFR er kominn í 8 manna úrslit á ECC, Evrópumóti landsmeistara sem haldið er í Olomouc í Tékklandi
Arnar byrjaði daginn illa, öfugt við hina keppnisdagana þar sem hann hefur spilað betur fyrri helminginn. Fyrir daginn í dag var Arnar í 6. sæti en eftir fyrri 4 leikina í dag var hann dottinn niður í 11. sæti. Seinni fjórir leikirnir voru hins vegar góðir og fyrir síðasta leik stóð keppni um 8 sætið á milli Arnars, Glenn Morten Pedersen frá Noregi og Jesper Agerbo frá Danmörku. Allir spiluðu þeir vel í síðasta leik en að lokum var það Glenn Morten sem sat eftir, 4 stigum á eftir Arnari sem tók 8. sætið.
Nú er framundan keppni í 8 manna úrslitum en þar eru leiknir 4 leikir og svo halda 4 efstu áfram í undanúrslit.
